Desde o principio, este blog tratou de relacionar o mundo do conto popular e as novas tecnoloxías. De igual maneira que se interesaba polos relatos populares do mundo, prestaba atención aos novos formatos de presentación que facilitan as TIC: contos audiovisuais, aventuras gráficas, ferramentas educativas da web 2.0, webquest baseadas no imaxinario, etc.
No momento actual, o blog está a punto de comezar unha nova experiencia. Forma parte dun proxecto máis amplo, ao que lle foi concedido o tempo necesario para o seu desenvolvemento. O título desta entrada fai referencia a ese novo traballo, pois tamén é o seu título, e analizará a utilidade dos contos no mundo das TIC. E talvez, para se adaptar mellor a esta nova realidade, o blog cambiará o seu nome por estoutro: Contomundi 2.0; aínda que a día de hoxe non está decidido.
A xente que se move nas novas tecnoloxías entende perfectamente a palabra colaboración. Sen ela, resultaría case imposible descubrir moitos dos tesouros que hai en internet. E algúns deses tesouros participan activamente nos cambios que se están a producir na educación, como as redes sociais, por exemplo. O vídeo que hai a continuación é unha boa mostra de todo isto…