23 sept. 2008

Accesorios máxicos para escribir na escola

A pesar de todo, a tecnoloxía actual (televisión, ordenador, Internet) non acabou co mundo do conto popular. Eses relatos aínda están presentes na vida de todos os nenos. E no seu universo infantil, a imaxinación e a fantasía son elementos básicos, como tamén o son na aprendizaxe da lingua escrita. Sobre todo, para ler, inventar e escribir historias.

Así e todo, a imaxinación e a fantasía parécense moito á forza muscular: unha cantidade excesiva non é demasiado recomendable, pero tampouco a súa escasez. En todo caso, a lectoescritura, a imaxinación e a fantasía, ao igual que a forza dos músculos, precisan dun entrenamento constante.

Pero ese coñecemento da lectoescritura é, en certo modo, a proba iniciática que se lles reclama aos nenos e nenas para que poidan integrarse plenamente na nosa sociedade. Por iso, nese proceso de aprendizaxe, é importante que usemos algún material preparatorio. Por exemplo, unhas actividades creativas que axuden na escola a perder o medo á palabra escrita.

Desde o mundo do conto e o imaxinario popular, Contomundi presentará os seguintes accesorios ou actividades:

  • As palabras poderosas
  • O binomio simbólico
  • As fórmulas da marabilla
  • O entramado fantástico
  • Os catálogos de ideas
  • O caldeiro máxico

Nos procesos de redacción resulta necesario que existan modelos de referencia. Non para que todos os nenos se volvan artistas, senón para evitar que a posibilidade de expresarse por escrito sexa o privilexio duns poucos.

Related Posts with Thumbnails