Storybook Weaver

Deses programas que hai para inventar historias e escribir na aula, Storybook Weaver sempre me gustou. Trátase dunha aplicación que ofrece moitas posibilidades na educación primaria, en castelán e en inglés, e que aquí apareceu co nome de El Pequeño Escritor. Como recurso para escribir é unha ferramenta áxil e motivadora, que facilita o paso da imaxinación creadora á pantalla do ordenador e ao papel impreso. Algunhas das posibilidades que proporciona son as seguintes:

• Aproximadamente 1.800 imaxes predeseñadas, coa opción de seren modificables.
• Arredor de 20.000 combinacións entre escenarios, cores e deseños propios.
• Incorporación de son e música, desde arquivos do mesmo programa.
• Distintos tipos de letras, coas mesmas características que un procesador de textos habitual.
• Vocalización dos textos escritos, aínda que con algúns problemas, pois o idioma de orixe é o inglés.
• Variedade de formatos para a impresión dos traballos en papel.
• E, sobre todo, a posibilidade de poder escribir nas diferentes linguas do currículo.

Este programa saíu ao mercado hai tempo, pero na versión máis actual funciona sen dificultades en Windows XP e Mac OS X. Ao parecer, entre as novas funcións destaca a opción de gardar os traballos como documentos web.